தொண்டையில் சிக்கிய சூயிங்கம்; முதலுதவி அளித்து நிம்மதி அடையச் செய்த சம்பவம்!
கேரள மாநிலம், கண்ணூர் மாவட்டம், பழையங்காடி பள்ளிக்கராவில், தொண்டையில் சூயிங்கம் சிக்கித் தவித்த 7 வயது சிறுமியை, அருகில் இருந்த இளைஞர்கள் முதலுதவி அளித்து காப்பாற்றிய சம்பவம் அனைவரையும் நெகிழ்ச்சியடைய செய்துள்ளது.
பழையங்காடி பள்ளிக்கராவைச் சேர்ந்த 7 வயது சிறுமி, சூயிங்கம் மென்றவாறு சைக்கிள் ஓட்டி வந்துள்ளார். அப்போது, எதிர்பாராதவிதமாகச் சூயிங்கம் அவளது தொண்டையில் சிக்கிக்கொண்டது. இதனால், சுவாசிக்க முடியாமல் திணறிய சிறுமி, அருகில் இருந்த இளைஞர்களை அணுகி உதவி கோரினாள்.
உடனே, அந்த இளைஞர்கள் சிறுமியின் முதுகு மற்றும் நெஞ்சில் தட்டி, முதலுதவி அளித்தனர். இதனால், சூயிங்கம் வெளியே வந்ததைத் தொடர்ந்து, சிறுமி நிம்மதி அடைந்தாள். இந்தச் சம்பவம் அப்பகுதியில் உள்ள சி.சி.டி.வி. கேமராவில் பதிவாகியுள்ளது. உரிய நேரத்தில் முதலுதவி அளித்த இளைஞர்களின் செயலைப் பொதுமக்கள் பாராட்டி வருகின்றனர்.
