மத்திய அரசின் நிதிப் பங்களிப்பு குறைவாக இருந்தபோதும், உள்நாட்டு உற்பத்தி இரட்டை இலக்கத்தில் வளர்ந்துள்ளது எனப் பெருமிதம்!
கடந்த நான்கரை ஆண்டுகளில் தி.மு.க. அரசு நிறைவேற்றிய திட்டங்கள்குறித்த பட்டியலைத் தமிழக நிதியமைச்சர் தங்கம் தென்னரசு வெளியிட்டார். அதில், தி.மு.க.வின் 505 தேர்தல் வாக்குறுதிகளில் 364 வாக்குறுதிகள் செயல்பாட்டில் இருப்பதாகவும், 40 வாக்குறுதிகள் பரிசீலனையில் இருப்பதாகவும் அவர் தெரிவித்துள்ளார்.
முக்கியத் திட்டங்கள் மற்றும் சாதனைகள்:
பொருளாதார வளர்ச்சி: உள்நாட்டு உற்பத்தி இரட்டை இலக்க அளவில் வளர்ந்துள்ளது. மத்திய அரசின் நிதிப் பங்களிப்பு சரியாக இல்லாவிட்டாலும், அரசுத் திட்டங்களை வெற்றிகரமாகச் செயல்படுத்தி வருகிறது.
வேலைவாய்ப்பு: பல்வேறு தேர்வாணையங்கள் மூலம் ஒரு லட்சம் இளைஞர்களுக்கு அரசுப் பணிகள் வழங்கப்பட்டுள்ளன. மேலும், 'நான் முதல்வன்' உள்ளிட்ட வேலைவாய்ப்பு முகாம்கள்மூலம் மூன்று லட்சம் பேருக்குப் பணி ஆணைகள் வழங்கப்பட்டுள்ளன.
கல்வி மற்றும் போக்குவரத்து: காலை உணவுத் திட்டம்மூலம் பள்ளி மாணவர்களின் வருகை 9% அதிகரித்துள்ளது. 'விடியல் பயணத்' திட்டத்தில் தினமும் சராசரியாக 65 லட்சம் பெண்கள் பயணம் செய்கின்றனர்.
உள்கட்டமைப்பு: 45 ஆயிரம் கிலோமீட்டர் தொலைவிற்கு புதிய சாலைகள் அமைக்கப்பட்டுள்ளன.
கோயில் நிலங்கள் மீட்பு: 7,400 ஏக்கர் கோயில் நிலங்களும், ரூ.7,658 கோடி மதிப்பிலான சொத்துக்களும் மீட்கப்பட்டுள்ளன.
எடப்பாடி பழனிசாமிக்கு பதிலடி:
"தமிழகத்தின் கடன்குறித்துப் பேசுபவர்கள், ஏன் இரட்டை இலக்க பொருளாதார வளர்ச்சிகுறித்துப் பேசுவதில்லை?" என்று எடப்பாடி பழனிசாமிக்கு பதிலடி கொடுத்த தங்கம் தென்னரசு, நிதி ஆணையத்தின் எல்லைக்குள்தான் கடன் உள்ளது என்றும், வாங்கும் கடன் எப்படி பொருளாதார மேம்பாடாக மாறுகிறது என்பதையும் விமர்சிப்பவர்கள் பார்க்க வேண்டும் என்றும் வலியுறுத்தினார்.
