கொட்டித் தீர்த்த கனமழையால் குடோன் முழுவதும் வெள்ளம்; நூற்றுக்கணக்கான புதிய கார்கள் தண்ணீரில் மூழ்கி சேதம்!
வரலாறு காணாத கனமழையால் ஹரியானா மாநிலம் வெள்ளத்தில் தத்தளித்து வரும் நிலையில், மாருதி சுசுகி நிறுவனத்திற்குச் சொந்தமான குடோனில் நிறுத்தி வைக்கப்பட்டிருந்த சுமார் 300 புதிய கார்கள் தண்ணீரில் மூழ்கி பெரும் சேதமடைந்துள்ளன. இந்தச் சம்பவம் அந்நிறுவனத்திற்குப் பல கோடி ரூபாய் இழப்பை ஏற்படுத்தியுள்ளது.
கடந்த சில நாட்களாக ஹரியானா மற்றும் பஞ்சாப் மாநிலங்களில் பெய்து வரும் தொடர் கனமழை, மக்களின் இயல்பு வாழ்க்கையைப் புரட்டிப் போட்டுள்ளது. பல இடங்களில் சாலைகள் துண்டிக்கப்பட்டு, குடியிருப்புப் பகுதிகளுக்குள் வெள்ள நீர் புகுந்துள்ளது. இதன் விளைவாக, ஹரியானாவில் உள்ள ஜஜ்ஜர் மாவட்டத்தில், பஹதுர்கார் பகுதியில் அமைந்துள்ள மாருதி சுசுகி நிறுவனத்தின் மிகப்பெரிய கார் குடோனும் வெள்ளத்தில் மூழ்கியுள்ளது.
வெள்ள நீர் சூழ்ந்ததால், குடோனில் நிறுத்தி வைக்கப்பட்டிருந்த நூற்றுக்கணக்கான புதிய கார்கள் தண்ணீரில் மூழ்கிப் பெரும் சேதமடைந்துள்ளன. வாகனங்கள் பாதி அளவு தண்ணீரில் மூழ்கியிருப்பதும், சில கார்கள் வெள்ளத்தில் மிதந்து செல்வதுமான காட்சிகள் சமூக வலைத்தளங்களில் வெளியாகி வைரலாகி வருகின்றன. இந்த வீடியோக்கள் பெரும் அதிர்ச்சியை ஏற்படுத்தியுள்ளன.
பொதுவாக, மழை நீரில் ஓடும் கார்களுக்குக் கூட இன்ஜினில் தண்ணீர் புகுந்து பழுது ஏற்படும். ஆனால், இங்கு நூற்றுக்கணக்கான புதிய கார்கள் முற்றிலுமாக வெள்ளத்தில் மூழ்கி இருப்பதால், அவற்றின் எலக்ட்ரிக்கல் மற்றும் இன்ஜின் பாகங்கள் முழுவதுமாகச் சேதமடைந்திருக்கலாம் என அஞ்சப்படுகிறது. இந்தச் சம்பவம் மாருதி சுசுகி நிறுவனத்திற்கு மிகப்பெரிய இழப்பை ஏற்படுத்தியுள்ளது. மழை நீர் வடிந்த பின், சேதமடைந்த கார்களை மீட்கும் பணிகளை அந்நிறுவனம் மேற்கொண்டு வருகிறது.
