கைத்தறிக்கு ஒரு புதிய பாணி! - தேசிய கைத்தறி தினத்தை முன்னிட்டு கோவையில் பிரமாண்ட ஃபேஷன் ஷோ!
தமிழகத்தின் பல்வேறு மாவட்டக் கல்லூரி மாணவர்கள் பங்கேற்பு; கைத்தறித் துறையின் முக்கியத்துவத்தை எடுத்துரைத்த மக்கள் சேவை மையம்!
கோயம்புத்தூர்: தேசிய கைத்தறி தினத்தை முன்னிட்டு, கைத்தறித் துறையின் பாரம்பரியத்தையும், அதன் சமூக - பொருளாதாரப் பங்களிப்பையும் உலகிற்கு எடுத்துரைக்கும் வகையில், கோவையில் ஒரு பிரமாண்ட ஃபேஷன் ஷோ நடைபெற்றது. கோவை மக்கள் சேவை மையம் சார்பில் நடத்தப்பட்ட இந்த ஹேண்ட்லூம் ஃபேஷன் ஷோ - சீசன் 8 பல இளைஞர்களைக் கவர்ந்தது.
கோயம்புத்தூர், திருப்பூர், ஈரோடு, மற்றும் நாமக்கல் ஆகிய மாவட்டங்களில் உள்ள பல்வேறு கல்லூரிகளில் நடைபெற்ற இந்த ஃபேஷன் ஷோ போட்டிகளின் இறுதிப் போட்டி, கோவையில் உள்ள கொங்குநாடு கலை மற்றும் அறிவியல் கல்லூரியில் வெகு சிறப்பாக நடைபெற்றது. இதில், பல்வேறு டிசைன்களில் கைத்தறி ஆடைகளை அணிந்து மாணவர்கள் மேடையில் அணிவகுத்தனர்.
இந்த விழாவிற்கு, கோவை தெற்கு தொகுதி சட்டமன்ற உறுப்பினர் மற்றும் மக்கள் சேவை மையத்தின் நிறுவனர் திருமதி. வனதி ஸ்ரீனிவாசன் தலைமையேற்றார். முக்கிய விருந்தினராகக் கவிஞர், எழுத்தாளர் மற்றும் Small Differences நிறுவனர் திருமதி. சோபனா குமார் கலந்து கொண்டு சிறப்பித்தார். அத்துடன், கொங்குநாடு கலை மற்றும் அறிவியல் கல்லூரி செயலாளர் மற்றும் இயக்குநர் டாக்டர். சி. ஏ. வசுகி, ஃபேஷன் தொழில்முனைவோர் திருமதி. சங்கீதா பீட்டர் ஆகியோர் சிறப்பு விருந்தினர்களாகப் பங்கேற்றனர்.
இந்த ஃபேஷன் ஷோ, வெறும் ஒரு போட்டியாக இல்லாமல், கைத்தறித் தொழிலின் நுட்பத்தையும், அழகையும் நவீன உலகிற்கு எடுத்துச் செல்லும் ஒரு முயற்சியாகப் பார்க்கப்படுகிறது. இந்த நிகழ்ச்சி, பாரம்பரிய கைத்தறி ஆடைத் தொழிலை மேம்படுத்தும் ஒரு புதிய உத்வேகத்தை உருவாக்கியுள்ளது.
in
தமிழகம்
