ஃபாஸ்டாக் ஆண்டுப் பாஸ்: ஒரு வருடம் அல்லது 200 பயணங்கள் மட்டுமே...பயணிகளுக்கான முக்கிய எச்சரிக்கை!
ஆகஸ்ட் 15 முதல் நடைமுறைக்கு வந்த ஃபாஸ்டாக் ஆண்டுப் பாஸ் திட்டம், ₹3,000 கட்டணத்தில், ஒரு வருட காலத்திற்கோ அல்லது 200 பயணங்களுக்கோ மட்டுமே செல்லுபடியாகும் என்ற முக்கிய நிபந்தனையுடன் அறிவிக்கப்பட்டுள்ளது.
இதுகுறித்து முழுமையாகத் தெரியாத பயணிகளிடையே ஒருவித குழப்பத்தையும், கேள்விகளையும் ஏற்படுத்தியுள்ளது.
புதியதாக அறிமுகப்படுத்தப்பட்டுள்ள இந்தத் திட்டம், தினசரிப் பயணிகளின் செலவுகளைக் குறைக்கும் வகையில் வடிவமைக்கப்பட்டுள்ளது. ஆனால், ஒரு ஆண்டு அல்லது 200 பயணங்கள் - இந்த இரண்டில் எது முதலில் நிறைவடைகிறதோ அதுவரை மட்டுமே இந்த பாஸ் செல்லுபடியாகும். உதாரணமாக, ஒருவர் தினமும் ஒரு முறை சுங்கச்சாவடியைக் கடந்து செல்கிறார் என்றால், அவருக்கு 100 நாட்களில் (ஒரு நாளைக்கு இருமுறை பயணம் என்றால் 50 நாட்களில்) 200 பயணங்கள் என்ற வரம்பு முடிந்துவிடும். அதன் பிறகு, அவர் மீண்டும் டோல் கட்டணம் செலுத்திப் பயணிக்க வேண்டும் அல்லது மற்றொரு பாஸைப் புதுப்பிக்க வேண்டும்.
இதனால், ஆண்டு முழுவதும் பயணம் செய்ய முடியும் என நினைத்து பாஸ் வாங்கியவர்களுக்கு, சில மாதங்களிலேயே அதன் செல்லுபடி காலம் முடிந்துவிடும் நிலை உருவாகிறது. அதேசமயம், வருடத்திற்கு 200 பயணங்களுக்குக் குறைவாகச் செய்பவர்களுக்கு, இந்தத் திட்டம் மிகவும் பயனுள்ளதாக இருக்கும். ஒருவேளை ஒரு வருடம் வரை 200 பயணங்கள் நிறைவடையவில்லை என்றால், ஓராண்டு முடிந்ததும் பாஸ் காலாவதியாகிவிடும்.
இந்த பாஸ், ராஜ்மார்க்யாத்ரா மொபைல் செயலி மற்றும் தேசிய நெடுஞ்சாலை ஆணையத்தின் இணையதளம் வழியாகப் பெறலாம். இருப்பினும், பாஸை வாங்குவதற்கு முன், ஒரு ஆண்டுக்கு அல்லது 200 பயணங்களுக்கு இந்த இரண்டில் எது முதலில் முடியும் என்பதை நன்கு ஆராய்ந்து முடிவு செய்ய வேண்டும் எனப் பயணிகள் மற்றும் வல்லுநர்கள் அறிவுறுத்துகின்றனர்.
