.jpg)
தொப்புள் கொடி கூட அகற்றப்படாத நிலையில் கொடூரம்; சிசிடிவி காட்சிகளுடன் வீரபாண்டி போலீசார் தீவிர வேட்டை!
.jpg)
தேனி அருகே வீரபாண்டி பகுதியில் பிறந்த சில மணி நேரமே ஆன பச்சிளம் ஆண் குழந்தை ஒன்று சாலையோரத்தில் சடலமாக மீட்கப்பட்ட சம்பவம் அப்பகுதி மக்களிடையே பெரும் சோகத்தையும், அதிர்ச்சியையும் ஏற்படுத்தியுள்ளது.
இயற்கை எழில் கொஞ்சும் தேனி மாவட்டத்தில், மனிதாபிமானமற்ற முறையில் பிஞ்சு உயிர் ஒன்று அநியாயமாகக் கொல்லப்பட்டுள்ள நிகழ்வு ஒட்டுமொத்தத் தமிழகத்தையே தலைகுனிய வைத்துள்ளது. இன்று அதிகாலை நடைபயிற்சி சென்றவர்களின் கண்களில் பட்ட அந்தச் சிறு உடல், ஒரு தாயின் பச்சைத் துரோகத்தை உலகிற்குப் பறைசாற்றியுள்ளது.
தேனி மாவட்டம், வீரபாண்டி பகுதியில் இன்று அதிகாலை பொதுமக்கள் வழக்கம்போல நடைபயிற்சியில் ஈடுபட்டிருந்தனர். அப்போது சாலையோரத்தில் சந்தேகத்திற்கு இடமான வகையில் ஒரு பொட்டலம் கிடப்பதைக் கண்டு அதிர்ச்சியடைந்தனர். அருகில் சென்று பார்த்தபோது, அது பிறந்து சில மணி நேரமே ஆன பச்சிளம் ஆண் குழந்தை என்பது தெரியவந்தது. உடனடியாக இதுகுறித்து வீரபாண்டி காவல்துறையினருக்குத் தகவல் தெரிவிக்கப்பட்டது.
சம்பவ இடத்திற்கு விரைந்து வந்த வீரபாண்டி போலீசார் மற்றும் சுகாதாரத்துறை அதிகாரிகள் குழந்தையை ஆய்வு செய்தபோது, அந்த ஆண் குழந்தை ஏற்கனவே உயிரிழந்து விட்டது உறுதி செய்யப்பட்டது. குழந்தையின் உடலில் தொப்புள் கொடி கூட அகற்றப்படாமல் இருந்ததைக் கண்ட மருத்துவர்கள், குழந்தை பிறந்து சில மணி நேரங்களே ஆகியிருக்கலாம் எனக் கணித்துள்ளனர். யாரோ மர்ம நபர்கள், குழந்தைப் பிறந்த உடனேயே அதைத் தூக்கிக்கொண்டு வந்து இரவோடு இரவாகச் சாலையோரத்தில் வீசிச் சென்றிருக்கலாம் எனச் சந்தேகிக்கப்படுகிறது.
இதனையடுத்து, ஆம்புலன்ஸ் மூலம் குழந்தையின் உடல் மீட்கப்பட்டு, பிரேதப் பரிசோதனைக்காகத் தேனி அரசு மருத்துவக்கல்லூரி மருத்துவமனைக்கு அனுப்பி வைக்கப்பட்டது. இந்த மனிதாபிமானமற்ற செயலில் ஈடுபட்டது யார்? என்பது குறித்து போலீசார் தீவிர விசாரணையைத் தொடங்கியுள்ளனர். முதற்கட்டமாக, அந்தப் பகுதியில் உள்ள சிசிடிவி (CCTV) கேமரா பதிவுகளைக் கைப்பற்றி, சந்தேகத்திற்கிடமான நபர்களின் நடமாட்டம் குறித்து ஆய்வு செய்து வருகின்றனர். அதிகாலையில் நடந்த இந்தத் துயரச் சம்பவம் வீரபாண்டி மற்றும் அதன் சுற்றுவட்டாரப் பகுதிகளில் பெரும் பரபரப்பை ஏற்படுத்தியுள்ளது.
