வாக்காளர் பட்டியல் திருத்தப் பணியால் வாக்குரிமை கேள்விக்குறி... உச்ச நீதிமன்றத்தில் வழக்கு தொடங்கும் திமுக! SIR Controversy in Tamil Nadu: DMK Launches Protest Against Special Intensive Revision of Voters List

நவ. 11 அன்று திமுக கண்டன ஆர்ப்பாட்டம்: உச்ச நீதிமன்றத்தில் வாக்காளர் பட்டியல் வழக்கு!

பீகார் மாநிலத்தைத் தொடர்ந்து தமிழகம் உட்பட நாட்டின் 12 மாநிலங்களில், வாக்காளர் பட்டியல் சிறப்பு தீவிர திருத்தப் பணிகள் கடந்த நவம்பர் 4-ஆம் தேதி முதல் தொடங்கப்பட்ட நிலையில், இதற்கு ஆளும் தி.மு.க. மிகக் கடுமையான எதிர்ப்பைத்  தெரிவித்து வருகிறது. இந்த அரசியல் களத்தின் மையப்புள்ளியாக SIR மாறியுள்ள நிலையில், இத்திருத்தப் பணியால் பல கோடி மக்களின் வாக்குரிமை கேள்விக்குறியாகி உள்ளதாக  தமிழக முதலமைச்சரும், தி.மு.க. தலைவருமான மு.க.ஸ்டாலின் தீவிரக் குற்றச்சாட்டுகளை  முன்வைத்துள்ளார்.

இந்தச் சூழலில், இந்திய தேர்தல் ஆணையம்  மேற்கொண்டு வரும் இந்த சர்ச்சைக்குரிய  சிறப்புத் தீவிர திருத்தப் பணி குறித்து, தி.மு.க.வின் மாவட்டச் செயலாளர்களுடன் கட்சியின் தலைவர் மு.க.ஸ்டாலின் இன்று காலை காணொளிக் காட்சி மூலம்  அவசர ஆலோசனைக் கூட்டத்தை  நடத்தினார். இதில் மாவட்ட அளவிலான பொறுப்பாளர்களும் பங்கேற்று தகவல் பரிமாற்றம்  செய்து கொண்டனர். இந்தக் கூட்டத்தில் பேசிய முதல்வர் ஸ்டாலின், சதி வலையில் சிக்காமல் வாக்காளர்களைக் காக்க வேண்டிய அவசர நடவடிக்கைகள்  குறித்தும், நிர்வாகிகள் கண்ணும் கருத்துமாகச்  செயல்பட வேண்டியதன் அவசியம் குறித்தும் பல்வேறு அறிவுறுத்தல்களை வழங்கினார்.

SIR-ஐ எதிர்த்து தி.மு.க. தொடர்ந்த வழக்கு, உச்ச நீதிமன்றத்தில் வரும் நவம்பர் 11-ஆம் தேதி விசாரணைக்கு வர உள்ள நிலையில், அதே நாளில் தேர்தல் ஆணையத்தைக் கண்டித்து தமிழகம் முழுவதும் தி.மு.க. கூட்டணிக் கட்சிகள் இணைந்து கண்டன ஆர்ப்பாட்டங்களை  நடத்தவும் இந்தக் கூட்டத்தில் தீர்மானிக்கப்பட்டது . கட்சியின் ஒவ்வொரு நிர்வாகிக்கும், அனைத்து வாக்குச்சாவடிகளிலும் கண்காணிப்பை பலப்படுத்த (Strengthen Monitoring) அவர் உத்தரவிட்டார். மேலும், SIR படிவத்தைப் பூர்த்தி செய்வதில் எழும் சந்தேகங்களைத் தீர்க்க, தி.மு.க. சார்பில் உதவி எண்ணையும்  முதல்வர் ஸ்டாலின் அறிவித்தார்.

இந்த ஆலோசனைக் கூட்டம் தொடர்பாக அவர் தனது 'X'  சமூக வலைதளப் பக்கத்தில் பதிவிட்டுள்ள அறிக்கையில், “தமிழகத்தை SIR எனும் ஆபத்து சூழ்ந்துள்ளது. நம் மக்களின் ஓட்டுரிமையைப் பாதுகாக்க, வரும் 11-ஆம் தேதி அனைத்து மாவட்டத் தலைநகரங்களிலும் ஆர்ப்பாட்டங்களை வெற்றிகரமாக நடத்திட அறிவுறுத்தல்களை வழங்கினேன்,” எனக் குறிப்பிட்டுள்ளார். அத்துடன், SIR-ஐ ஏன் எதிர்க்கிறோம் என்பதை விளக்கும் விளக்க வீடியோ ஒன்றையும் அவர் வெளியிட்டு, எதிர்க்கட்சிகள் செய்யும் பரப்புரைக்குப் பதிலடி  கொடுத்துள்ளார். தலைமைத் தேர்தல் ஆணையத்தின் தேர்தல் கால அட்டவணையின்படி, SIR பணி டிசம்பர் 4 வரை நடைபெற்று, இறுதி வாக்காளர் பட்டியல் பிப்ரவரி 7, 2026 அன்று வெளியிடப்படும்  என்பது குறிப்பிடத்தக்கது.

S.I.R-ஐ ஏன் எதிர்க்கிறோம்?#SIR குறித்து எதிர்க்கட்சிகள் செய்யும் பரப்புரைக்குப் பதில்!

S.I.R குறித்த பொதுமக்களின் சந்தேகங்களுக்கு உதவி எண்: 08065420020#தமிழ்நாடு_தலைகுனியாது #தமிழ்நாடு_போராடும் #தமிழ்நாடு_வெல்லும் pic.twitter.com/LPjsNsHJqv

— M.K.Stalin - தமிழ்நாட்டை தலைகுனிய விடமாட்டேன் (@mkstalin) November 9, 2025