.jpg)
உச்ச நீதிமன்ற அதிரடி உத்தரவு: திரட்டிய ஆதாரங்களை சிபிஐயிடம் ஒப்படைக்க உத்தரவு; சம்பவம் தேசத்தையே உலுக்கியது என நீதிமன்றம் கருத்து!
.jpg)
புது தில்லி, அக்டோபர் 13: கரூர் மாவட்டத்தில் தமிழக வெற்றிக் கழகத்தின் (த.வெ.க.) பரப்புரையின்போது ஏற்பட்ட கூட்ட நெரிசலில் 41 பேர் உயிரிழந்த சம்பவம் தொடர்பாகத் தமிழக அரசு அமைத்திருந்த ஓய்வுபெற்ற நீதிபதி அருணா ஜெகதீசனின் ஒருநபர் விசாரணை ஆணையத்தின் பணிகளை உடனடியாக நிறுத்திவைக்க உச்ச நீதிமன்றம் இன்று (அக். 13) உத்தரவிட்டுள்ளது.
சிபிஐ விசாரணைக்கு உத்தரவிட்டதன் தொடர்ச்சியாக, இந்த விசாரணை ஆணையம் இதுவரை திரட்டிய அனைத்து ஆதாரங்கள் மற்றும் ஆவணங்களை உடனடியாக சிபிஐயிடம் ஒப்படைக்க வேண்டும் என்றும் உச்ச நீதிமன்றம் உத்தரவிட்டுள்ளது.
உச்ச நீதிமன்றத்தின் முக்கியப் பார்வைகள் மற்றும் உத்தரவுகள்:
சம்பவத்தின் முக்கியத்துவம்: கரூர் கூட்ட நெரிசல் சம்பவம் 'தேசத்தையே உலுக்கிய ஒரு சம்பவம்' என்று உச்ச நீதிமன்றம் கருத்துத் தெரிவித்தது.
ஓய்வுபெற்ற நீதிபதி மேற்பார்வைக் குழு: சிபிஐ விசாரணையானது, ஓய்வுபெற்ற நீதிபதி அஜய் ரஸ்தொகி தலைமையில் அமைக்கப்பட்ட மூன்று பேர் கொண்ட குழுவின் மேற்பார்வையில் நடைபெறும் என்று ஏற்கனவே உத்தரவிடப்பட்டிருந்தது. ஓய்வுபெற்ற நீதியரசர் தலைமையிலான இந்தக் குழு, உடனடியாகத் தனது முதல் கூட்டத்தைக் கூட்ட வேண்டும் என்று உச்ச நீதிமன்றம் உத்தரவிட்டுள்ளது.
இந்தக் குழுவின் செயல்பாடுகளுக்கான செலவு முழுவதையும் தமிழக அரசே ஏற்க வேண்டும் என்றும் உச்ச நீதிமன்றம் உத்தரவிட்டுள்ளது. முன்னதாக, கரூர் கூட்ட நெரிசல் வழக்கில், சென்னை உயர் நீதிமன்றம் அமைத்த சிறப்புப் புலனாய்வுக் குழுவின் (SIT) விசாரணையை ரத்து செய்து, சிபிஐ விசாரணைக்கு உச்ச நீதிமன்றம் இன்று உத்தரவிட்டது குறிப்பிடத்தக்கது.
