குறைந்த விலையில் டிக்கெட் விற்று வந்த வடபழனி திரையரங்கம்; பழைய நினைவுகளைச் சுமந்து இடிப்புப் பணிகள் தொடக்கம்!
சென்னையின் திரையரங்க அடையாளங்களுள் ஒன்றாக கடந்த 50 ஆண்டுகளாகத் திகழ்ந்த வடபழனி ராஜேஸ்வரி திரையரங்கத்தை இடிக்கும் பணிகள் இன்று தொடங்கப்பட்டுள்ளது. குறைந்த கட்டணத்தில் திரைப்படங்களை ரசித்துவந்த மக்கள் மத்தியில் இது பெரும் சோகத்தை ஏற்படுத்தியுள்ளது.
வடபழனியின் முக்கிய அடையாளமாகத் திகழ்ந்த ராஜேஸ்வரி திரையரங்கம், கடந்த ஐந்து தசாப்தங்களாகத் திரைப்பட ரசிகர்களுக்குக் காட்சியளித்து வந்தது. குறிப்பாக, நவீன திரையரங்குகளின் வருகைக்குப் பிறகும், இங்கு சாதாரண மக்கள் பார்க்கும் வகையில் டிக்கெட் விலை நிர்ணயிக்கப்பட்டிருந்தது.
கொரோனா தொற்றுக்கு முன்புவரை செயல்பட்டு வந்த இந்தத் திரையரங்கத்தில், அதிகபட்சமாகவே ரூ.40 முதல் ரூ.60 வரை மட்டுமே டிக்கெட்டுகள் விற்கப்பட்டன. இதனால், மலிவு விலையில் திரைப்படங்களை ரசிக்க விரும்பும் பல ஆயிரம் பேரின் விருப்பமான இடமாக இந்தத் திரையரங்கம் விளங்கியது.
இந்நிலையில், தற்போது இந்தத் திரையரங்கத்தை இடிக்கும் பணி தொடங்கியுள்ளது. இது, சென்னையின் சினிமா வரலாற்றில் ஒரு சகாப்தம் முடிவுக்கு வந்ததைக் குறிக்கிறது. குறைந்த விலையில் தரமான திரைப்பட அனுபவம் அளித்துவந்த ராஜேஸ்வரி திரையரங்கத்தின் இடிப்பு, பழைய நினைவுகளைச் சுமந்த பலருக்கு ஏமாற்றத்தை அளித்துள்ளது.
