கடலூர் தலைமை தபால் நிலையம் மற்றும் உழவர் சந்தையில் பரப்புரைக்கு அனுமதி கேட்டு தமிழக வெற்றிக் கழகம் கடிதம்!
கடலூர்: தமிழக வெற்றிக் கழகம் (தவெக) தலைவர் விஜயின் கடலூர் பரப்புரைப் பயணம், நவம்பர் 22-ஆம் தேதிக்கு பதிலாக அக்டோபர் 11-ஆம் தேதிக்கு திடீரென மாற்றப்பட்டுள்ளது. இந்தத் திடீர் பயண மாற்றம் கடலூர் மாவட்டத்தில் பெரும் பரபரப்பை ஏற்படுத்தியுள்ளது.
கட்சித் தலைவர் விஜயின் அரசியல் பரப்புரைப் பயணங்கள் தமிழகம் முழுவதும் நடைபெற்று வரும் நிலையில், கடலூர் மாவட்டத்திற்கான தேதி நவம்பர் 22-ஆம் தேதி என முன்னர் அறிவிக்கப்பட்டிருந்தது. தற்போது அந்தத் தேதி மாற்றப்பட்டு, வரும் அக்டோபர் 11-ஆம் தேதி கடலூரில் பரப்புரை நடத்தத் திட்டமிடப்பட்டுள்ளது.
இதற்கான அனுமதி கேட்டு, தமிழக வெற்றிக் கழகம் சார்பில் கடலூர் மாவட்ட காவல் கண்காணிப்பாளருக்கு அதிகாரப்பூர்வமாக ஒரு கடிதம் அளிக்கப்பட்டுள்ளது. அந்தக் கடிதத்தில், கடலூர் தலைமை தபால் நிலையம் மற்றும் உழவர் சந்தை ஆகிய பகுதிகளில் பரப்புரைக்கு அனுமதி அளிக்குமாறு கோரிக்கை வைக்கப்பட்டுள்ளது.
விஜயின் இந்தத் திடீர் பயண மாற்றத்திற்கான காரணம் குறித்து அதிகாரப்பூர்வ தகவல் எதுவும் வெளியாகவில்லை. எனினும், சட்டமன்றத் தேர்தலுக்கு இன்னும் சில மாதங்களே உள்ள நிலையில், கட்சியின் பணிகளை விரைவுபடுத்தும் நோக்கில் இந்த மாற்றம் செய்யப்பட்டிருக்கலாம் என அரசியல் வட்டாரங்கள் தெரிவிக்கின்றன.
