மதுரை: கஞ்சா விற்பனையை தட்டிக்கேட்ட தந்தையும், மகனும் அரிவாள் வெட்டு - அதிர்ச்சி வீடியோ வைரல்!
சோலை அழகுபுரம் பகுதியில் சம்பவம்; போதை கும்பல் வெறியாட்டம்; மதுரை அரசு மருத்துவமனையில் சிகிச்சை.
மதுரை, ஜூலை 7: மதுரை மாவட்டம், சோலை அழகுபுரம் பகுதியில் கஞ்சா மற்றும் போதை மாத்திரைகள் விற்பனை குறித்து காவல் நிலையத்தில் புகார் அளித்த கார்த்திக் என்பவரையும், அவரது தந்தையையும் ஒரு போதை விற்பனைக் கும்பல் அரிவாளால் சரமாரியாக வெட்டியுள்ளது. இந்த கொடூர சம்பவம் குறித்த பதறவைக்கும் வீடியோ சமூக வலைத்தளங்களில் வைரலாகி பெரும் அதிர்ச்சியை ஏற்படுத்தியுள்ளது.
சம்பவத்தின் விவரம்: சோலை அழகுபுரம் பகுதியில் சட்டவிரோதமாக கஞ்சா மற்றும் போதை மாத்திரைகள் விற்பனை செய்யப்படுவதை அறிந்த கார்த்திக், இதுகுறித்து காவல்துறையிடம் புகார் அளித்துள்ளார். இதனால் ஆத்திரமடைந்த கஞ்சா விற்பனை கும்பல், கார்த்திக்கை குறிவைத்து அவரது தந்தை முன்னிலையிலேயே அரிவாளால் வெட்டியுள்ளது. அவர்களை தடுக்க முயன்ற அவரது தந்தைக்கும் அரிவாள் வெட்டு விழுந்துள்ளது.
காயமடைந்த கார்த்திக் மற்றும் அவரது தந்தை இருவரும் மதுரை அரசு ராஜாஜி மருத்துவமனையில் தீவிர சிகிச்சை பெற்று வருகின்றனர். பகல் வெளிச்சத்தில், மக்கள் நடமாட்டம் உள்ள பகுதியில் துணிச்சலாக இந்த கொடூரச் செயலை போதை கும்பல் நிகழ்த்தியுள்ளது, அப்பகுதி மக்கள் மத்தியில் பெரும் அச்சத்தையும், கோபத்தையும் ஏற்படுத்தியுள்ளது.
இந்தச் சம்பவம் குறித்து மதுரை காவல்துறையினர் வழக்குப்பதிவு செய்து விசாரணை மேற்கொண்டு வருகின்றனர். தலைமறைவாக உள்ள போதை விற்பனைக் கும்பலை கைது செய்ய தனிப்படைகள் அமைக்கப்பட்டு தேடுதல் வேட்டை தீவிரப்படுத்தப்பட்டுள்ளது. போதைப்பொருள் விற்பனையை ஒழிக்க அரசு கடுமையான நடவடிக்கை எடுக்க வேண்டும் என பொதுமக்கள் வலியுறுத்தியுள்ளனர்.
