பழனி: பழனி அருள்மிகு தண்டாயுதபாணி சுவாமி திருக்கோவில் அடிவாரத்தில், பழனி நகராட்சி சார்பில் வாகனங்களுக்கு "சுங்கக் கட்டணம்" என்ற பெயரில் வசூலிக்கப்படும் கட்டணம் பக்தர்கள் மத்தியில் பெரும் கொந்தளிப்பை ஏற்படுத்தியுள்ளது. நகராட்சிக்கு முறையான பார்க்கிங் வசதிகள் இல்லாத போதும், நிர்ணயிக்கப்பட்ட கட்டணத்தை விட கூடுதலாகவும், திரும்பும் போது மீண்டும் கட்டணம் வசூலிப்பதாகவும் பக்தர்கள் புகார் தெரிவித்துள்ளனர்.
பழனி முருகன் கோவிலுக்கு தினந்தோறும் தமிழ்நாட்டின் பல்வேறு பகுதிகள் மட்டுமின்றி, பிற மாநிலங்களிலிருந்தும் ஆயிரக்கணக்கான பக்தர்கள் வாகனங்களில் வந்து செல்கின்றனர். கோவில் அடிவாரத்தில், நகராட்சி சார்பில் வாகனங்களுக்கு "சுங்கக் கட்டணம்" என்ற பெயரில் கட்டணம் வசூலிக்கப்படுகிறது.
நகராட்சி நிர்ணயித்துள்ள கட்டணங்கள் பின்வருமாறு:
• கார்களுக்கு: ₹70 (24 மணி நேரத்திற்கு)
• வேன்களுக்கு: ₹100
• லாரிகளுக்கு: ₹115
• பேருந்துகளுக்கு: ₹150
இந்தக் கட்டணம் 24 மணி நேரத்திற்குச் செல்லுபடியாகும் எனக் கூறப்பட்டாலும், நிலைமை அதற்கு மாறாகவே உள்ளது. "நாங்கள் ஒருமுறை கட்டணம் செலுத்திவிட்டு, மறுநாள் காலை திரும்பும் போது மீண்டும் கட்டணம் கேட்கிறார்கள். அதுமட்டுமின்றி, நிர்ணயிக்கப்பட்ட ₹70-க்கு பதிலாக ₹80 அல்லது ₹90 என கூடுதலாக ₹10 முதல் ₹50 வரை அடாவடியாக வசூலிக்கின்றனர்," என்கிறார் சென்னையிலிருந்து வந்த பக்தர் ஒருவர்.
மலைப்பகுதிகளுக்கும், திண்டுக்கல், தேனி, கோவை, கொடைக்கானல், ஒட்டன்சத்திரம், திருப்பூர் போன்ற பகுதிகளுக்கும் செல்லும் வாகனங்கள் பழனி நகர் வழியாகச் செல்லும் போதும் இந்தக் கட்டணம் வசூலிக்கப்படுவதாகக் கூறப்படுகிறது. இதனால், கோவில் பக்தர்களுடன், அப்பகுதி வழியாகச் செல்லும் பிற பயணிகளும் பாதிக்கப்படுகின்றனர்.
கோவில் நிர்வாகம் சார்பில் இலவச பார்க்கிங் வசதிகள் இரண்டு இடங்களில் ஒதுக்கப்பட்டுள்ளன. ஆனால், அவை பெரும்பாலும் நிரம்பிவிடுகின்றன. இதனால், பக்தர்கள் கட்டணம் செலுத்தி நகராட்சிக்குச் சொந்தமான இடங்களில் வாகனங்களை நிறுத்த வேண்டிய கட்டாயத்திற்கு ஆளாகின்றனர். "நகராட்சிக்கு வாகனங்களை நிறுத்துவதற்கு முறையான இடமோ, பார்க்கிங் வசதியோ இல்லை.
இருந்தபோதிலும், சுங்கக் கட்டணம் என்ற பெயரில் வசூல் வேட்டை நடத்துகிறார்கள்," என ஆதங்கப்படுகிறார் மதுரையைச் சேர்ந்த பக்தர்.
குறிப்பாக, கார்த்திகை, மார்கழி, மற்றும் தை மாதங்கள் போன்ற திருவிழா காலங்களில் பழனிக்கு வரும் பக்தர்களின் எண்ணிக்கை அதிகரிக்கும். அச்சமயங்களில் வாகனப் போக்குவரத்து நெரிசல் ஏற்படுவதோடு, கட்டண வசூலும் இன்னும் கடுமையாக்கப்படுவதாகப் பக்தர்கள் தெரிவிக்கின்றனர்.
பக்தர்கள் நலன் கருதி, நகராட்சி நிர்வாகம் வாகனக் கட்டண வசூலை முறையாக நெறிப்படுத்த வேண்டும் என்றும், அடாவடி வசூலைத் தடுக்க வேண்டும் என்றும், இலவச பார்க்கிங் வசதிகளை விரிவுபடுத்த வேண்டும் என்றும் சமூக ஆர்வலர்கள் மற்றும் பக்தர்கள் கோரிக்கை விடுத்துள்ளனர். இந்த நிலை நீடித்தால், புனிதத் தலமான பழனிக்கு வரும் பக்தர்களின் எண்ணிக்கை குறைய வாய்ப்புள்ளதாகவும் அவர்கள் எச்சரித்துள்ளனர்.
in
தமிழகம்
