இரவு நேரங்களில் ஒளிரும் ஸ்டிக்கர்கள் இல்லாமை; குழப்பமான வழிகாட்டுதலால் வாகன ஓட்டிகள் தவிப்பு!
 |
| File Image |
சென்னை:தமிழகத்தின் தேசிய மற்றும் மாநில நெடுஞ்சாலைகள் முழுவதும் தற்போது அதிக அளவில் வைக்கப்பட்டுள்ள பேரிகேட்களால் விபத்துகள் அதிகரிப்பதாக வாகன ஓட்டிகள் மத்தியில் தீவிர சந்தேகம் எழுந்துள்ளது. சாலையில் பாதுகாப்பை உறுதி செய்ய வைக்கப்பட்ட இந்தத் தடுப்புகள், முறையான ஒளி அமைப்பு இல்லாததால், இரவு நேரங்களில் பெரும் அச்சுறுத்தலாக மாறியுள்ளன.
முன்பு காவல் நிலையங்கள், சுங்கச் சாவடிகள் அல்லது வாகனச் சோதனைச் சாவடிகள் போன்ற பகுதிகளில் மட்டுமே காணப்பட்ட இந்தப் பேரிகேட்கள், தற்போது மாநிலம் முழுவதும் பரவலாக வைக்கப்பட்டுள்ளன. இவை பொதுவாக நல்ல நோக்கத்துடன் வைக்கப்பட்டிருந்தாலும், அவற்றில் பெரும்பாலானவற்றில் ஒளியை உள்வாங்கி எதிரொளிக்கும் ஸ்டிக்கர்கள் இல்லாமல் இருப்பதுதான் மிகப் பெரிய சிக்கலாக உள்ளது.
இரவு நேரங்களில், இந்த ஸ்டிக்கர்கள் இல்லாத பேரிகேட்கள் வாகன ஓட்டிகளின் கண்களுக்குத் தென்படுவதில்லை. இதனால் கடுமையான விபத்துகள் ஏற்படுவதாகத் தகவல்கள் தெரிவிக்கின்றன. மேலும், சில இடங்களில் எதிரெதிரே இரண்டு அல்லது மூன்று தடுப்புகள் எந்தவித தெளிவான வழிகாட்டுதலும் இல்லாமல் வைக்கப்பட்டுள்ளன. இடது புறம் செல்ல வேண்டுமா அல்லது வலது புறம் செல்ல வேண்டுமா என்ற குழப்பமான தடுமாற்றமே பல விபத்துகளுக்குக் காரணமாக அமைவதாகவும் குற்றச்சாட்டுகள் எழுந்துள்ளன.
வாகன ஓட்டிகள் மற்றும் பொதுமக்களின் பாதுகாப்பை உறுதி செய்யும் வகையில், தமிழக அரசும், நெடுஞ்சாலைத் துறை மற்றும் காவல்துறை அதிகாரிகளும் இந்தப் பிரச்சினையில் உடனடியாகத் தலையிட வேண்டும், சாலைகளில் இருக்கும் அனைத்து பேரிகேட்களிலும் உயர் தரமான ஒளிரும் ஸ்டிக்கர்கள் மற்றும் தெளிவான வழிகாட்டுதல் அடையாளங்களை அமைத்து, பயணிகளின் பாதுகாப்பை உறுதி செய்ய வேண்டும் என்பதே அனைவரின் வேண்டுகோள்.
in
தமிழகம்
