கரியமில வாயு உமிழ்வு தொடர்ந்தால் 2100-ல் பெரும் பாதிப்பு; பருவமழை காலத்தில் கடும் வெள்ளம் ஏற்படும் என அண்ணா பல்கலை. எச்சரிக்கை!
சென்னை: கரியமில வாயு உமிழ்வு தொடர்ந்து அதிகரித்து வந்தால், 2100-ஆம் ஆண்டில் தமிழ்நாட்டில், சென்னை உட்பட 14 மாவட்டங்களில் கடல்மட்ட அளவு கணிசமாக உயரும் என அண்ணா பல்கலைக்கழகம் ஒரு அதிர்ச்சித் தகவலை வெளியிட்டுள்ளது. இது, தமிழ்நாட்டின் கடலோரப் பகுதிகளில் ஒரு பெரும் அச்சுறுத்தலை ஏற்படுத்தியுள்ளது.
அண்ணா பல்கலைக்கழகத்தின் காலநிலை மாற்றம் மற்றும் பேரிடர் மேலாண்மை மையத்தைச் சேர்ந்த பேராசிரியர் ராமச்சந்திரன் அவர்கள், இந்த ஆய்வு முடிவுகளை வெளியிட்டுள்ளார். கடல்மட்ட உயர்வால், பருவமழைக் காலங்களில் கடலோர மாவட்டங்கள் கடும் வெள்ளப் பாதிப்பை எதிர்கொள்ள நேரிடும் என்றும், இது விவசாயம், குடியிருப்புகள் மற்றும் உள்கட்டமைப்பைப் பெரிதும் பாதிக்கும் என்றும் அவர் எச்சரித்துள்ளார்.
காலநிலை மாற்றத்தின் விளைவாக ஏற்படும் இந்த ஆபத்தைத் தடுக்க, உடனடியாகக் கரியமில வாயு உமிழ்வைக் குறைப்பதற்கான நடவடிக்கைகளை எடுக்க வேண்டும் என அவர் வலியுறுத்தியுள்ளார்.
