பைக் பிரியர்களுக்கு அதிர்ச்சி! 350cc-க்கு மேற்பட்ட பிரீமியம் பைக்குகளுக்கு ஜிஎஸ்டி 40% ஆக உயர வாய்ப்பு!
ராயல் என்ஃபீல்டு, கேடிஎம் பைக்குகளின் விலை ரூ.45,000 வரை உயரும் என தகவல்! சிறிய ரக பைக்குகளுக்கு வரி குறையலாம்!
350cc-க்கு மேல் திறன் கொண்ட பிரீமியம் ரக இருசக்கர வாகனங்களுக்கான ஜிஎஸ்டி (GST) வரி 40% ஆக உயர்த்தப்படலாம் என்ற பரிந்துரை வெளியாகி, பைக் பிரியர்கள் மற்றும் வாடிக்கையாளர்களுக்கு அதிர்ச்சியை ஏற்படுத்தியுள்ளது.
தற்போது 28% ஜிஎஸ்டி வரி விதிக்கப்படும் இந்த பிரீமியம் பைக்குகளுக்கு, வரி 40% ஆக உயர்த்தப்பட்டால், வாகனங்களின் விலை ரூ.45,000 வரை அதிகரிக்க வாய்ப்புள்ளது. இந்த வரி உயர்வால் ராயல் என்ஃபீல்டு (Royal Enfield), கேடிஎம் (KTM), பஜாஜ் (Bajaj) போன்ற பிரீமியம் பைக் தயாரிப்பு நிறுவனங்களும், அவற்றின் வாடிக்கையாளர்களும் பாதிக்கப்படுவார்கள்.
அதே சமயம், 350cc-க்கு குறைவான சிறிய ரக பைக்குகள் மற்றும் ஸ்கூட்டர்களுக்கான ஜிஎஸ்டி வரி தற்போதுள்ள 28%லிருந்து 18% ஆகக் குறைக்கப்படலாம் என்றும் தகவல்கள் வெளியாகியுள்ளன. இது சிறிய ரக வாகனங்களின் விலையைக் குறைத்து, நடுத்தர வகுப்பு வாடிக்கையாளர்களுக்குச் சாதகமாக அமையும்.
ஜிஎஸ்டி குழுமத்தின் இந்தக் கடைசி முடிவு இன்னும் அதிகாரப்பூர்வமாக அறிவிக்கப்படவில்லை என்றாலும், இந்த மாற்றங்கள் இருசக்கர வாகனச் சந்தையில் பெரும் தாக்கத்தை ஏற்படுத்தும் என எதிர்பார்க்கப்படுகிறது.
