விஜய்க்கு இபிஎஸ் மறைமுக அழைப்பு: "திமுகவை எதிர்க்கும் அனைவரும் இணையலாம்!"
சேலம்: நடிகர் விஜய் தலைமையிலான தமிழக வெற்றி கழகத்தை (தவெக) தங்கள் கூட்டணியில் இணைக்கும் சாத்தியம் குறித்து, அ.தி.மு.க பொதுச்செயலாளர் எடப்பாடி பழனிசாமி மறைமுகமாக அழைப்பு விடுத்துள்ளார்.
"திமுகவை அகற்றுவதே எங்கள் நோக்கம்"
"உங்கள் கூட்டணியில் இணைய தவெக கட்சிக்கு அழைப்பு விடுக்கப்படுமா?" என்ற கேள்விக்கு பதிலளித்த எடப்பாடி பழனிசாமி, "திமுகவை எதிர்க்கும் அனைத்து ஒத்த கருத்துடைய கட்சிகளும் இணைந்து தேர்தலில் கூட்டணி அமைத்துப் போட்டியிட வேண்டும் என்பதே எங்கள் நோக்கம்," என்று திட்டவட்டமாகத் தெரிவித்தார்.
மேலும், "திமுகவை அகற்றப்பட வேண்டும் என எண்ணுபவர்களுடன் கூட்டணி வைப்பதில் மகிழ்ச்சி. அவர்களும் இதற்கு ஒத்துழைக்க வேண்டும் என்பதுதான் எங்களுடைய கருத்து," என்றும் அவர் கூறினார்.
எடப்பாடி பழனிசாமியின் இந்த கருத்து, எதிர்வரும் தேர்தல்களில் தி.மு.க.வை எதிர்கொள்ள ஒரு பலமான கூட்டணியை அ.தி.மு.க. உருவாக்க விரும்புவதையும், அதற்காக தவெக போன்ற புதிய கட்சிகளையும் சேர்த்துக் கொள்ளத் தயாராக இருப்பதையும் மறைமுகமாக உணர்த்துவதாக அரசியல் நோக்கர்கள் கருதுகின்றனர். விஜய்யின் அரசியல் நகர்வுகள் உன்னிப்பாகக் கவனிக்கப்பட்டு வரும் நிலையில், இபிஎஸ்-ன் இந்த அழைப்பு தமிழக அரசியலில் புதிய விவாதங்களை உருவாக்கியுள்ளது.
